Iam rursus pereunt annus mensisque December
pauper in externa nascitur urbe Deus.
Constat iter regis iussu peragrasse parentes
et miseram fessos incoluisse casam
mater ubi in lucem uirgo dedit omnipotentem
diuum qui lueret crimina nostra cruce.
Huc magus accedens natum ueneratur Iesum
sidere nocturnam praecipiente uiam
et uenit opilio dum gaudent desuper hymnis
angelici dominum magnificare chori.
Squalida percipiunt mundi cunabula regem,
halitibus puerum bos asinusque fouent.
Vos quoque natalem Christi celebrate fideles,
sub nitida iaceant arbore dona probis.
Nessun commento:
Posta un commento